هربان من الجيش

كنت عائداً من مسرح الطليعة ، انتهي عرض " كاليجولا" ، وأنا في غاية السعادة ، شديد الفرح بأصدقائي ، الذين لعبوا دور " الأشراف" . وفي الطريق رن هاتفي – لا مؤاخذه – المحمول
- أيوه مين ؟ - أيوه؟ في حد يرد يقول " أيــــــــــــــوه ؟" – مد من سبع حركات–
- عمي محمد عامل اه؟
- حلو يا اخويا ، قافل تلفونك لا ؟ بقيت مهم خلاص ؟

- هاهاهاها ابدا والله كنت في المسرح بس
- طيب ، بكره تروح لفتحي عبد الفتاح ، خدت لك معاد معاه بخصوص النشر
- متشكر قوي يا عم محمد
- علي اه يا درش ؟ خد بالك واوعي تتاخر عليه بكره الساعة 12 في الاوبرا ، تصبح علي خير
اغلقت الهاتف ، وقد انفتحت ابواب السماء والأرض ، والتاريخ ، والجنه ، والقصور ، ومراكب النيل ، والأوتيلات ، والقاعات المكيفة ، وغرف الجتماعات– لاحظ انني لم أذكر الأبواب السرية الخلفية غالبا ببيوت المهتمات جداً بالثقافة الشابة الحديثة-
- انت يا كابتن ؟
- مين ؟ انا ؟
- ايوه انت ( في تقزَز مخيف )
- نعم
- فين بطاقتك ( بطئتك كما نطقها )
- اتفضل ، بس ممكن اعرف مين حضرتك ؟
- هكون مين يعني؟
- انا اسف ياباشا ( رغم يقيني انه مجرد امين شرطة اسم الله ، لكنني كنت في اشد الحاجة ان اصل شقتي بسرعة ، والا ادع أي شئ يعكَر مزاجي ، خاصة في تلك اللحظة التي انفتحت لي فيها كل الأبواب )
- انت من الصعيد !!!! إمــ مممم ايه اللي جايبك هنا ؟
- انا شغال هنا حضرتك
- مش مكتوب ، مكتوب حاصل علي بكالوريوس علوم
- فعلا بس انا شغال في شركة هنا قطاع خاص
- طيب طيب ( في قرف شديد )
ابتلعت هذا القرف ، حتي تمر لحظاتي السعيدة بخير
- بس انت جاي منين دلوقت ( دلوأت ) انا شايفك وانت جاي من بعيد
- حضرتك انا جاي من ناحية المترو ( لاحظ انني لازلت استخدم حضرتك ، وباسلوب مصطنع )
- طيب ماشي ، فين موقفك من التجنيد ؟ ( نطقها موقفك هذه المرة )
- أه ؟ موقفي من التجنيد ؟
- ايوه فين هو ؟
- انت ماشوفتنيش وأنا جاي ماشي عليك ؟ ( لاحظ رفع كلمة حضرتك )
- شوفتك ياسيدي ( في بلاهة ، وغباء ، واستظراف ، وبرود )
- طيب طالما شوفتني ، بتسألني علي موقفي من التجنيد لا ؟
- ليه؟ ( في حدَه) دا شغلي يااستاذ
ملحوظة
منذ ان تخطيت عتبات سلَم المترو ، وقد لاحظت أن هذا الكائن يرمقني ، ويتابع حركاتي ، وبالتأكيد لاحظ مشيتي جيداً ، ورأي عرْجتي التي بقدمي اليمني رأي العين ، فهي واضحة للأعمي
- ما اناعارف انه شغلك وبعدين
- فين موقفك من التجنيد ؟( موقفك أيضاً )
ظننت أنه لايري
- بص كده ؟ شوف انا بمشي كيف ؟
- هو أنا هناسبك؟ انا مالي ( في غباء مخيف )
- عندك حق ، أنت عاوز موقفي من التجنيد ؟
- أه
- انا هربان من الجيش
- إيه؟
- هربان من الجيش ، سمعت هربان من الجيش
- طيب قدامي ( اودامي ) علي حضرة الظابط
وصلنا للضابط ، قدَم له بطاقتي ، كلَمني الضابط
- انت بتشتغل هنا ؟
- أيوه ( لاحظ لغتي الحاده )
- ماله يا حضرة الأمين ؟ ( لاحظ تجاهله لي )
- ما معهوش موقفه ( موأفه هذه المرة ) من التجنيد ياباشا
- ياابني موقف ايه ؟ انت مابتشوفش؟
- ايوه ياباشا بس دا بيقوللي إنه هربان
تدَخلت لأنهاء الأمر لأنني بدأت في الاختناق
- انا قلت كده لما لقيت انه سؤال يضايق
- طيب خلاص خلاص ، اتفضل يااستاذ البطاقة بتاعتك وبعدين لما يسالك حد تاني رد كويس
- يعني ارد اقول اه ؟
- قوله انا ماليش جيش
ابتلعت ضحكتي ، وحمدت الله انني عدت مرة اخري لشقتي محافظا علي مزاجي الرائق ، وعند الباب ، صرخت ( طيب علي الطلاق انا هربان من الجيش )