مصر كـــــــــــــــــــــــــــــــده

ترددت كثيرا لأنني أعرف كم الهجوم الذي سيتم علي البلوج بعدما أفرغ من هذا التحليل لكنني قررت المغامره

لقد كثر الحديث عن "مصر مش كده " في الفتره الأخيره لذا قررت ألا أبدي أي رأي قبل أن أتريث لكي أدخل في مناقشات ولغط حول مين صح ومين غلط وقد أتيحت لي الفرصه بعدما اخذت اجازه سنويه من الشغل وزارتني صديقه من بلاد المعلم سام وكان لزاما عليا أن أكون الجايد بتاعها وهم مما لاشك فيه مولوعون بالتصوير لكنني دون مقدمات خطرت لي الفكره لماذا لا أكتشف علي أرض الواقع مصر تبقي ايه؟ كده؟ ولا مش كده ؟

تعالوا نشوف مع بعض مصر ايه؟؟؟؟؟؟؟؟؟؟؟؟؟؟؟؟؟؟؟

عمنا ابليس قرر يسب الدين لمصر هو حر ، فيه غيره غيران قوي عليها برضه هو حر، فيه غيره شايفها كده ، فيه غيره شايفها مش كده

سألونى بتحب مصر ؟ ... قلت يلعن دينك لدين مصر

تعالوا نشوفها من جديد بكل حريه وديمقراطيه بعيونا وبعيون غيرنا ، بكتب مدرستنا الابتدائي وبكتب مدارس ابتدائي بس مش هنا

تعالوا نشوفها باحساسنا وبعقل غيرنا

مستعدين للرحله؟؟؟؟؟؟؟؟؟؟؟

من هنا بدأنا

لا يمكن لأي زائر لمصر أيا كان صفته او وضعه الاجتماعي ولا يسأل عن الاهرامات وابو الهول وبالفعل وانا في المطار سألتني فين الاهرامات ؟ في سخريه معتاده قلتلها " متأجره النهارده " وكانت عايزانا نطلع من المطار الساعه 4 العصر علي هناك قبل ما تفكر حتي هتسكن فين ، المهم عقلتها بكلمتين وقلتلها ترتاحي النهارده ونروح بكره

ورحنا الاهرامات ، بيني وبينكم انا رايح وانا ايه ياما هنا ياما هناك تقولش رمسيس التاني ده كان خالي!!! ما علينا

مش هينفع ادخل بيها الهرم زي ما بعمل كل مره دي مش واحده صاحبتي واخدها الهرم بس علشان نبقي في البراح دي هتلف وهتسأل وهيبقي يومها ما يعلم بيه الا ربنا

سألت اهل الخير فين يا جدعان الناس اللي بتبقي مع اخوانا السواح دول وبعد رحله طويله ما بين شاب روش بجل في شعره لشاب أروش شعره طايل سلسلة ضهره وشكله كده من سكان مدينة نصر الميه مقطوعه عنده من سنه واكتر ، المهم قابلت المعلم

سيجاره يا بيه ؟

شكرا يا باشا

المدام والا ايه ؟ شكلك مصري مش توريست

لا والله ابدا دي واحده صاحبتي جايا من امريكا زياره

امريـــــــــــــــــــــــــــكا حته واحده ؟

لا حتتين بس دي الحته الاولانيه

فيه تلات رحلات يا باشا واحده كبيره وواحده متوسطه وواحده كده مش من مقامك

خمنت مباشرة انها ستعتمد علي السعر

اديني اللي مش من مقامي يا معلم

لا ازاي انت مقامك الدنيا بحالها

بكام يا معلم

هتركب حنطور ولا جمل ولا حصان

في نفسي " ما فيش حمير ؟ " طيب ثواني اسألها

طبعا انا عارف هتختار ايه جمل " الاختيار هنا لا علاقه له بالحزب الوطني اطلاقا " لأنها جايه متخيله انا مستنيها بجمل في المطار
160جنيه ليها علشان خاطرك وانت هكرمك كفايه 40 جنيه علشان مصري

يا بلاش !!!!! يا عم المعلم دا انا اللي هدفع

ما انا عارف هو لو هيه اللي داخله عليا هقولها الاسعار دي ؟
160 جنيه يا كفره علشان تركبوا الناس جمل بيرجعوا يتريقوا علينا بعد كده بيه ، 160 جنيه علشان عشر دقايق ؟ وانا اللي لو عايز اركب جمل 160 يوم ممكن ادفع لعمي ابو هشيمه في البلد 160 قرش

يا باشا دي انكلودينك التذاكر

داخل بقي معاها علي نفس الجمل وانا حاسس اني ابن الاستاذ خوفو ، وفجأه وانا عمال افتكر وأعصر دماغي وبرجع لكتاب الاعداديه واترجملها ، تقولي هو فيه تعابين في الصحرا دي ؟

يا بنت الجزمه جايه من اخر الدنيا تشوفي فيه تعابين في الصحرا والا لا؟

أفقت من وهمي الكبير وقلت ربما صدمت من الاسعار هناك نروح حته أرخص

بابيرس يا مدام ؟

قررت الذهاب بها لمكان اخر في اليوم التالي ممفيس وشبرامنت ودهشور، المكان مكتظ بالرجاله بتاعة بايبرس يا مدام ، وطبعا للي مش عارف الفرق بين البايبرس والموز احنا بنبيع للسياح قلوب موز علي انها بايبرس بردي


المفاجأه ان صديقتي أخرجت ورقه مطبوعه علي الانترنت غريبه جدا فيها سعر لكل حاجه من الابره للصاروخ بالمصري وبالدولار وسعر البياع والسعر اللي توافق عليه بس ، ومش هحكيلكم علي الفروق طبعا ابو خمسه جنيه في الورقه بتلاتين وبقيت زي اللي في سوق خضار مضطر افاصل واكذب علشان ما تفهمش حاجه " من باب أنا لا أكذب ولكني أتجمل " لكن علي مين وانتهي اليوم التاني بمأساه ملخصها إن احنا حراميه








الجمَال يفترش الأرض
في طريق عودتنا من ممفيس يكتظ الطريق بمدارس تعليم السجاد ، في الحقيقه لم يعر انتباهي ، لكن صديقتي استوقفتها العنواين المكتوبه بطراز جميل وسألتني عن امكانية اكتشاف ما تحتويه هذه الأبنيه
وبالفعل دخلنا ، شئ في غاية الروعه ، أطفال صغيره تبدع وتخرج قطع فنيه في غاية الجمال ولا يلتفت إليهم أحد ، دعك من كرم الضيافه والمقابله التي ليس وراءها أي أغراض أخري


















مذبحة القلعه
فشل أجدادي الفراعنه في تحسين صورتي امام الخواجيه ، ازاي؟ وكل الكلام اللي قريناه وبيقولوه ده يبقي ايه؟ هجايص؟ أيوه هجايص ، ما فيش حد بيفضل شايل تاريخه علي أكتافه زي ما احنا بنعمل كده ، ويقدر يمشي بيه سبعة الاف سنه !!!!!!!!! لازم يتعب
احنا يا حضرات عاملين زي اللي لاوي عنقه للخلف ومتأكد انه بكده هيقدر يبقي وسط الناس اللي ماشيه ، مش ممكن عنقه لازم يتخلع ، وكل الناس هتمشي وهو محلَك سر
فكرت أبعد عن الفراعنه شويه ، وقررت اروح القلعه ، دي بقي مش هتعجبها بس ، دا مش بعيد تديني الجنسية كمان
المكان غايه في الجمال ، هادي ، ما فيش بياعين من اللي بيجروا وراك انت والمدام في كل شبر بتمشي فيه
بس للاسف كل ما تسألني عن حاجه " دونت نو سْري " لأن احنا ما اخدناش في المدرسه غير الفراعنه ن طيب فين الرجاله اللي في كل حته من بتاع الفراعنه بيقولوا لك عايز " جايد " يا باشا ؟
كل اللي قدرت عليه اني صليت ركعتين في جامع محمد علي ودعيت من قلبي علي اللي كان السبب

تــــــــــــــــــــــــاني فراعنه؟؟؟؟؟؟؟

الطبع يغلب التطبع يا جدعان ، بعد كل اللي حصل لي من اجدادنا البعدا ، رجعت حنيت تاني ، ماله المتحف المصري؟ زي الفل ، ومليان اجانب ، يعني الناس دي مش بتفهم وأنا بس اللي بارم ديله ؟ نروح المتحف المصري
لسه بنقول يا صبح ويا فتاح يا عليم ، والباشا أمين الشرطه ( اسم الله ) ابتدا المشوار
انت شغال في السياحه ؟
لا دي صديقه جايه زياره
يعني ايه صديقه ؟ مراتك يعني؟
مراتي ؟ لا صديقه
انت بتشتغل ايه ؟
كيميائي
اه اتفضل
كنت لحظتها في نصف هدومي الناس دي بتتضايق لما حد يتكلم قدامهم بلغه مش فاهمينها ، وكان شكلي إني مطلوب القبض عليه ، وكل شويه " واتس رونج " وانا طبعا " ناثنج " وعايز اضرب الجحش ده بالجزمه
ونخش المتحف يا محترم ما فيش حته توحَد ربنا مش عندهم امال بنتفشخر علي ايه ؟ لما كل تاريخنا متهرب؟
هروح فين تاني كل اللي اتقالنا علي بلدنا في نظر الناس طلع كدب ن دا غير كمْ الأسئله علي كمية الأمن دي ليه؟ والبلد بتدفع لكل دول منين؟ مش دا عبء علي الحكومه برضه؟
رد انت بقي يا محترم؟ تقول ايه في سؤال اجباري زي ده؟

بوسطن تحتضن ترب الغفير
كان الأمر المقلق لصديقتي الضوضاء ، وحركة السيارات التي شبهتها بديزني لاند ، واصرارها علي ان الدوله يجب ان تضع حدا لقائدي السيارات الذين يكسرون القوانين ( هي تعتقد أن الدوله وضعت قوانين ) فسألتني عن مكان من الأماكن التي أحب أن اهرول إليها عندما أحتاج للهدوء ، فأخبرتها أن أماكني لا تصلح لها ولن تعجبها المهم بعد إلحاح ( مش إصرار ) ذهبت بها لجنينة الأزهر ( كان خوفي من أن تري في مثل هذا المكان الرائع بشاعة القاهره ) عليك أن تري الجمال في الجنينه ، وأن تغلق عينك من الامتداد لتري المكان الذي تقطن فيه فقد لا تعاود إليه وتتجه لترب الغفير مباشرة





























صور الجنينه


مصر اللي مزعَله الناس
كانت من أجمل لحظات عمري تلك التي كنت أجري فيها علي النيل وأنط في قلبه ، حاسس إنه أبويا وباخده بالحضن ، ولما كانت أمي تمنعني ، كنت أفضل أعيط ، لحد ما ترضي تخليني أروح مع العيال ، النيل مش كوبري قصر النيل ، وانت واقف مع واحده بتحلموا ببكره اللي انتوا متأكدين إنه مش جاي، ولا العربيات اللي فيها شباب روش وبنات أروش، ولا هو اللي تطل عليه من الأتوبيس قم فجأه تكتشف إنك بتحبه ، النيل صاحبك اللي تروحله في ليل الصيف يعملك شاي علي شطه ، النيل في عز زعله بيبقي شايل الخير وجاي ، ممكن يثور وياخد اللي بيحبهم قوي بالحضن لحد ما يموتوا ، ومش كلنا بنفهم إن ده حب ، النيل واحده قاعده بتغسل معاه هدومها وهدوم جوزها وهمومها ، مش واحده بترقص علي بطنه
قررت أقضي ليله للصبح علي النيل ، يمكن يكون اتعدل حاله ويغسل البلاوي كلها اللي حكيتلكوا عليها
لقيت مصر اللي مزعلا كم




































رحله في التاريخ السرَي لسيد كشمر!!!!
لم أملك شئ إلا أن أحاول أن اجعلها تقرف من رحلتها وتمشي ، تعمل ايه ياواد تعمل ايه ياواد ؟ اخدها عندي في البلد وتتفرج بقي علي اللي عمرها ما هتشوفه ، والله ليلة واحده مع ناموسنا الصعيدي ، وأمريكا تعلن الحرب علينا بحجة تعرض إحدي مواطناتها للايذاء كانت كلما تتكلم تتحدث عن مصر وكأنها قطعه من زمن متخلف لا يعرف شيئا عن التقدم أو الحضاره اللي مصدعين دماغنا بيها وهناك في البلد كنت ناوي أخليها ترجع منها علي المطار ، خدتها ورحت لسيد كشمر ، مصري زيي وزيك ، بس ما يعرفش حاجه عن التاريخ المزيف ، كل اللي يعرفه في حياته غيطه والأحصنه بتاعته وبس
كنت مندهشا ، لقد صعقت بما رأته رغم أنه بسيط وحقيقي وغير مزيف وبدون مكياج أو مونتاج وهي دي مصر ، مصر اللي بعيده عن اعلانات التليفزيون وتغيير الدستور ، مصر الطيبه اللي بتقوم من النوم في الفجر وتنام في العشاء ، مصر اللي بتعرق علشان تطلع خير ارضها اللي سرطنوه ولادها ، مصر أمي اللي بتقلع براسها وتتجه للسماء تدعوا لي الله أن يحميني من الشرور ، مصر أخويا اللي جاي من الجيش بالبياده والزيتي ، مصر أختي اللي بتسأل من ورا الباب علي اللي بيخبط وتقوله اتفضل ، مصر اللي أفراحها مش براقصات ، وبشوات بيشربوا ويسكي ومخدرات ، مصر اللي بتروح الليله الكبيره بجامع سيدي احمد بن شديد ، وبتروح الليله الكبيره للعدرا ، مصر اللي بتخبط علي بيت جيرانها ببتاوه سخنه ساعة الضهريه للرجاله اللي جايه عرقانه من الغيطان ،هيه دي مصر ، مش مصر مش كده ولا كده